ალტერნატიული ზრუნვა
მომსახურება განკუთვნილია იმ ბავშვებისა და ახალგაზრდებისთვის, რომლებმაც დაკარგეს ბიოლოგიური ოჯახის მხრიდან ზრუნვის შესაძლებლობა.
როდესაც სხვადასხვა მიზეზის გამო ოჯახები ვერ ახერხებენ ბავშვებსა და ახალგაზრდებზე ზრუნვას, მათზე პასუხისმგებლობას იღებს სახელმწიფო, მომსახურების მიმწოდებელი ორგანიზაციების დახმარებით. აღნიშნული ზრუნვა შეიძლება იყოს დროებითი, ან გრძელვადიანი. ყველა ეს მომსახურება მოიცავს როგორც უსაფრთხო და სტაბილური საცხოვრებლის არსებობას, ისე ხელმისაწვდომობას საკვებსა და ბაზისურ მოთხოვნილებებზე, განათლებაზე, ჯანდაცვაზე, დასაქმების შესაძლებლობებსა და ფსიქო-ემოციურ მხარდაჭერაზე. ზრუნვის გრძელვადიანი მიზანია, რომ მოამზადოს ბავშვები და ახალგაზრდები დამოუკიდებელი ცხოვრებისთვის, აღჭურვოს ყველა შესაძლო უნარითა და რესურსით.
ზრუნვის გრძელვადიანი მიზანი ბავშვებისა და ახალგაზრდების დამოუკიდებელი ცხოვრებისთვის მომზადება და ყველა საჭირო უნარითა და რესურსით აღჭურვაა.
- 01
მინდობითი აღზრდა
მინდობით აღზრდა ბავშვზე ზრუნვის ერთ-ერთი ალტერნატიული ფორმაა, რომელიც სახელმწიფოსა და მიმღებ ოჯახს შორის დადებული ხელშეკრულების საფუძველზე არასრულწლოვანზე ზრუნვას, მის მოვლასა და აღზრდას გულისხმობს. პროგრამის მიზანი ბავშვის ოჯახურ გარემოში აღზრდა და მისი განვითარების ხელშეწყობაა.
ბავშვების მოთავსება მინდობით აღზრდაში შესაძლებელია 21 წლის ასაკამდე. ამასთანავე, დედმამიშვილების მოთავსება ხდება ერთ ოჯახში. სახელმწიფოსთან გაფორმებული მემორანდუმის თანახმად, საქართველოს SOS ბავშვთა სოფელი 2024 წლიდან უზრუნველყოფს მინდობით აღმზრდელების მოძიებას, მათ გადამზადებასა და ბავშვის გადაყვანის შემდგომ მუდმივ მხარდაჭერას - იქნება ეს კონსულტაციები, მხარდამჭერი ჯგუფები თუ მიმდინარე ტრენინგები.
- 02
მცირე საოჯახო ტიპის სახლები
ეს არის ოჯახურ გარემოსთან მიახლოებული ზრუნვის მომსახურება 6-18 წლის ასაკის ბავშვებისა და მოზარდებისთვის, რომლებმაც სხვადასხვა მიზეზით დაკარგეს მშობლების ზრუნვა და საჭიროებენ ოჯახურ გარემოს. აღნიშნულ მომსახურებაში ზრუნვას უზრუნველყოფენ პროფესიონალი აღმზრდელები - ხშირ შემთხვევაში, წყვილები, რომლებსაც ფსიქოლოგის, სოციალური მუშაკისა და კოორდინატორისგან შემდგარი მულტიდისციპლინური გუნდი უწევს მხარდაჭერას.
მომსახურება ცდილობს, ბავშვებისთვის უზრუნველყოს სტაბილური მზრუნველი ფიგურა, რათა მათ ჩამოიყალიბონ გრძელვადიანი, უსაფრთხო კავშირი ზრდასრულ მზრუნველ პირთან, ჰყავდეთ პოზიტიური როლური მოდელი, განივითარონ ინტერესები და ცხოვრებისეული უნარები. ჰქონდეთ ხელმისაწვდომობა განათლებაზე, ჯანდაცვაზე, დასაქმებასა და ფსიქო-ემოციურ მხარდაჭერაზე. ისწავლონ პასუხისმგებლობების აღება საკუთარ თავზე და მოემზადონ დამოუკიდებელი ცხოვრებისთვის. ამჟამად, SOS ბავშვთა სოფელში ფუნქციონირებს 11 მცირე საოჯახო ტიპის სახლი. მათგან, 2 თბილისში, 3 ქუთაისში, ხოლო თითო - ზესტაფონში, ხონში, წალენჯიხასა და ამბროლაურში.
- 03
ახალგაზრდების მხარდაჭერა
ახალგაზრდების მხარდაჭერა გულისხმობს 18-21 წლამდე ახალგაზრდების დახმარებას, რომლებიც სახელმწიფო ზრუნვის სისტემიდან გადიან სრულწლოვანების მიღწევის გამო, თუმცა ჯერ მზად არ არიან სრულად დამოუკიდებელი ცხოვრებისთვის. SOS ბავშვთა სოფელი მათ სთავაზობს როგორც სოციალურ საცხოვრისს, ისე ფორმალური და არაფორმალური განათლების შესაძლებლობებს, დასაქმებისთვის საჭირო უნარ-ჩვევების განვითარებასა და ფსიქო-ემოციურ მხარდაჭერას.
აღნიშნულ მომსახურებაში აქცენტი გადატანილია ზრუნვიდან მხარდაჭერაზე, რაც გულისხმობს ახალგაზრდების დამოუკიდებლობის ხელშეწყობასა და გაძლიერებას. ამჟამად, SOS ბავშვთა სოფელში ფუნქციონირებს 5 ახალგაზრდული საცხოვრისი. 4 თბილისში და 1 ქუთაისში.
სხვა ძირითადი მიმართულებები
გაიგე მეტი ორგანიზაციისა და პროგრამების შესახებ
გამოიწერე ელექტრონული წერილები სიახლეებსა და ორგანიზაციის საქმიანობის შესახებ.